«Ахтан-санаан ааһыахха»

Ыам ыйын 9 күнэ дойдубут хас биирдии олохтооҕор ураты суолталаах, дириҥ өйдөбүллээх. Улуу Кыайыы күнэ – элбэх омуктаах норуот сүдү күүһүн уонна модун санаатын кэрэһитэ буолар. Арассыыйа олохтоохторун сомоҕолуур ытык бырааһынньыкка аан дойдуга эйэни уонна көҥүл олоҕу түстээбит аҕа көлүөнэ дьон үтүө ааттарыгар, холооно суох хорсун быһыыларыгар сүгүрү­йэбит. Тоҥор, аччыктыыр диэни аахсыбакка, күлүм да гынар түгэҥҥэ саарбахтыыр санааҕа ылларбакка, сырдык олоххо эрэли сүрэхтэригэр бигээн аҕалбыт чугас дьоммутун ахтан-санаан ааһабыт. Ол аймалҕаннаах кэмҥэ 62 тыһыынчаттан тахса Саха сирин олохтооҕо Аҕа дойдуну көмүскүүргэ туруммута. Аҕаларбыт, эһээлэрбит, убайдарбыт, бырааттарбыт алаастартан, нэhилиэктэртэн уонна куораттартан уоттаах сэ­­риигэ барар ыллыктара Улуу Кыайыыга суолу тэлбиттэрэ. Кинилэр хабыр хапсыһыы уоттаах холоругун ааспыттара, төрөөбүт сирдэригэр чиҥник үктэнэн Кыайыы өрөгөйүн бэйэлэрин эрэ дойдуларыгар буолбакка, Европа, Азия дойдуларыгар эмиэ аҕалбыттара. Биһиги биир дойдулаахтарбыт халабырдьыт фашистары кытта хорсуннук сэриилэспиттэрэ, бэргэн ытааччы быһыытынан биллибиттэрэ. Аҥаардарыттан ордуга уот­таах сэрии хонуутугар букатыннаахтык хаалбыта. Тыылга хаалбыт кырдьаҕастар, оҕолор, ийэлэр бэриниилээх, сыралаах үлэлэринэн Улуу Кыайыыны уһансыбыттара. Төрөөбүт дойдуларыгар төннөн кэлбит саллааттар оччотооҕу кэм уустуктарын аахсыбакка, эйэлээх олоҕу тутуспуттара.

Биһиги нэһилиэккэ Улуу Кыайыы 81 сылын бырааһынньыктааҕы парааттан саҕалаатыбыт. Нэһилиэкпит бары олохтоохторо Кыайыы пааматынньыгар мустан, өйдөбүнньүк гирлянда ууран, ытык дьоммутун кэриэстээтибит. Орто оскуола коллектива «Саллаат хааһытынан» күндүлээтэ. Оҕолорго Кыайыы эстафетата, улахаттарга граната быраҕыытыгар күрэх буолан ааста. Тэрилтэлэр хас биирдии «Сэрии сылын оҕолоругар» бэлэхтэри туттардылар. Онтон киэһэ «Аллан» норуот айымньытын дьиэтигэр «Ахтан-санаан ааһыахха» бырааһынньыктааҕы концерт буолла. Сэрии тематыгар ырыалар ылланнылар уонна үбүлүөйдээх суруйааччыларбытыгар анаан кылгас кээмэйдээх испиктээктэри көрүү буолла. Ол курдук, Орто оскуола педколлектива Д.К. Сивцев — Суорун Омоллоон «Күкүр Уус», кыра тэрилтэлэр холбоһон «Үөрэхтээхтэр уонна үөттүрэх», уһуйаан үлэһиттэрэ «Бэйэтэ эмтиэкэ», А.И.Софронов — Алампа «Дьүһүн кубулуйумтуо» айымньытынан бэтэрээн сэбиэтэ көрдөрдө, Н.Е.Мординов — Амма Аччыгыйа «Тоҕус төгүл тоҕотун» оскуола үөрэнээччилэрэ оонньоотулар. Сүрдээх интэриэһинэй, киһи эрэ көрө олоруох, артыыстар уобараска киирэн бэртээхэйдик оонньоотулар. Интэн киэһэ дохсун ардаҕы аннынан олохтоохтор «Свеча памяти» бүтүн Арассыыйатааҕы акцияҕа кыттан өйдөбүнньүк чүмэчини уурдулар. Ким да умнуллубат — туох да умнуллубат!