Самаан сайыны көрсө.

Биһиги нэһилиэккэ «Тиэргэн» оҕуруоччуттар түмсүүлэрэ үлэлээбитэ балачча сыл буолла. Сааскы көрсүһүү быйыл ыам ыйын 20 күнүгэр ыытылынна. Тэрээһини олохтоох библиотекарь Ульяна Ивановна салайан ыытта. Оҕуруоччуттарга сүбэлэр, теплицаны сууйуу-сотуу тематын иһитиннэрдэ. Бахчавой культураны баһылаабыт Матрена Турантаева, клубниканы олордуу туһунан Надежда Таркайцева бэйэлэрин хас да сыллааҕы уопуттарын, кэтээн көрүүлэрин, үүнээйини бүөбэйдээһиннэрин туһунан билиилэрин үллэһиннилэр. Итини сэргэ сынньалаҥ кэмҥэ оонньуу тэрилиннэ. Оҕуруоччуттар рассада арааһын аҕалан атыылаатылар уонна атастастылар, алыс астынан тарҕастылар.

Саха дьонугар былыр-былыргыттан сааскы Ньукуолун күнэ олус ытыктанар, улахан суолталаах, күүтүүлээх. Бу күн уһун кыһыны этэҥҥэ туораан, күөххэ үктэнии үөрүүтэ-өрөгөйө буолар. Мөккүөрдээх соҕус да буоллар, бу күнү сорохтор өссө саха Саҥа дьылынан ааттыыллар.

Ол иһин да буолуо, биһиги өбүгэлэрбит Ньукуолун күн айылҕаҕа тахсан сири-дойдуну аһатан, Айыыһыттарыгар сүгүрүйэн туран, салама ыйаан баҕа санааларын этэллэрэ, инники олохторун түстүүллэрэ, кырыа кыһын кэнниттэн налыччы, астына-дуоһуйа айылҕалыын алтыһаллара.

Ньукуолун иннинэ күн хайа сатанарынан суунан-тараанан, киртэн-хохтон ыраастанан, саҥа эбэтэр ыраас таҥаһы кэтэр үгэс баар. Ити – туох баар кири, хара дьайы киэр кыйдаан, тэйитэн баран, саҥа дьылга, саҥа олоххо саҥалыы үктэнэбит диэн ис хоһоонноох. Ытыктанар сиэртэн-туомтан биирдэстэрэ – салама ыйааһына. Салама айыыларга тахсар далаһа, кинилэр бу саламаҕа кэлэн түһэллэр диэн өйдөбүллээх. Итэҕэл быһыытынан, бу күн үрдүк Айыылартан Иэйиэхсит Хотун сиргэ түһэр. Ол иһин өбүгэлэрбит айылҕаҕа тахсан, сир-дойду иччитин Аан Алахчын Хотуну алҕаан, ытыктаан, хатыҥ маска салама ыйыыллар. Үгэс быһыытынан, сайылыкка көһөн тиийэн баран, саламаны халдьаайыга тахсан хатыҥ маска баайаллар. Салама икки көрүҥнээх: салама уонна дэлбиргэ. Дэлбиргэ булка ананан оҥоһуллар. Дьахталлар сылгы сиэлинэн эриэн ситии хаталлар. Уһуна 10-12, 17 миэтэрэ буолуон сөп. Туостан ынах, ат, ыаҕайа томторук оҥороллор. Ону таһынан саламаҕа маҥан сиэл кыбытыллыахтаах уонна айылҕа өҥнөөх таҥас кырадаһынын, тэҥ гына тутан баайыллыахтаах. Саламаҕа хара өҥ киирбэт. Былыр салама ыйаммыт сирэ «ытык сир» дэнэр эбит. Ону мээнэ тыытыа, алдьатыа, үрэйиэ суохтааххын. Тоҕо диэтэххэ, салама дьону харыстыыр, көмүскүүр аналлаах уонна киһиэхэ саҥа тыыны биэрэр. Бу саха киһитэ төрөөбүт айылҕатын кытта ситимэ. Биһиги нэһилиэк эр дьоно Байанай бэлэҕиттэн аҕам саастаах дьону амсатар үгэскэ кубулуйбут акцияҕа сылын аайы кыттыыны ылаллар. Быйыл Николай Варламов, Иннокентий Колодезников, Николай Голиков, Иван Никулин, Василий Новгородов биэрбит кустарын түҥэттибит. Дьоммут-сэргэбит олуһун диэн астыннылар, үөрдүлэр. Үтүө сайын үүннэҕэ буолуохтун!