Орто оскуолаҕа уонна уһуйааҥҥа оҕо ыһыахтара буоллулар, оҕолор сайыҥҥы сынньалаҥҥа тарҕастылар.

Ыам ыйын 26 күнүгэр оскуола тиэргэнигэр, оҕолор, төрөппүттэр, учууталлар, маанылаах ыалдьыттар самаан сайыны уруйдуу көрүстүлэр. Таһырдьа самыырдыыр буолан түһүлгэ киэргэтэн, сандалы тэрийэн ыһыах оскуола иһигэр тэрилиннэ. Оҕолор кылаастарынан «Маанылаах сандалы», «Бастыҥ бүлүүдэ», «Уһун суһуох», «Саха маанылаах таҥаһа» күрэхтэргэ кытыннылар. Алгыс сиэрин-туомун биир дойдулаахпыт Петр Егорович Самсонов — Бүөтүр Хара толордо. Кэлбит ыалдьыттар алгыс ылан үөрдүбүт, астынныбыт. Оһуохай маанылаах түһүлгэтэ тэриллэн биир да киһи туора туран хаалбакка, кыттыһан күннүү эргийэн Таатталыы оһуохай дьиэрэйдэ. хас биирдии кылаас, үөрэнээччи илии тутуурдаах, өттүк харалаах тарҕастылар.

Ыам ыйын 28 күнүгэр уһуйааммытыгар кырачааннар ыһыах ыстылар. Сыл устата билбит билиилэрин киэҥ эйгэҕэ көрдөрдүлэр. Ырыа, хоһоон, үҥкүү, олоҥхо, чабырҕах этилиннэ. Өбүгэ оонньуута мас тардыһыы ыытылынна, сүүрүү буолла. Иитээччилэр, төрөппүттэр таппыт маанылаах остуолларыгар олорон сиэр быһыытынан ыһыах аһын амсайааһын буолла.

Сайыҥҥы күн барахсан сүрэх нарын иэйиитин, өй-санаа сааһыланыытын, дууһа уоскулаҥын аҕаллын айанньыт былыттар уйгуну түстээтиннэр, аргыс былыттар быйаҥы билгэлээтиннэр. Самаан сайын кэлбитинэн баргытын эҕэрдэлиибит!