Нэһилиэккэ ырааһырдыы үлэтэ тэрилиннэ

2026 сыл бэс ыйын 10 күнүгэр Хара Алдан нэһилиэгин олохтоох дьаһалтатын көҕүлээһининэн ырааһырдыы үлэтэ тэрилиннэ. Дэриэбинэ таһынааҕы скотомогильник күрүөтэ саҥалыы тутулунна уонна бөх тоҕор (свалка) территориятыгар улахан субуотунньук тэрилиннэ. Тулалыыр айылҕаны ыраас тутар туһугар тэриллибит үлэҕэ нэһилиэк 30-ча көхтөөх олохтооҕо, дьаһалта үлэһиттэрэ уонна тэрилтэлэр кыттыыны ыллылар. Субуотунньук көдьүүһүн үрдэтэр уонна кутталлаах бөҕү-саҕы, сири-уоту бэрээдэктиир туһуттан 3 анал техника тардылынна. Үлэҕэ ДТ гусеничнай трактор, «Беларус» трактор, «Сокол» вездеход көхтөөхтүк туһанылыннылар. Кинилэр көмөлөрүнэн ыарахан матырыйааллары уонна мунньуллубут бөҕү таһыы, сири тэҥнээһин үлэтэ түргэнник ыытылынна. Бу тэрээһин нэһилиэк иһинэн экологическай туругу тупсарарга, араас сыстыганнаах ыарыылар тарҕанар кутталларын намтатарга уонна тулалыыр айылҕаны ыраас тутарга туһуланна. Скотомогильник курдук ураты болҕомтону эрэйэр тутуу сирин-уотун бэрээдэктээһин – олохтоох дьон доруобуйатыгар уонна ынах-сүөһү куттала суох сылдьарыгар улахан суолталаах. Кэлбит дьон күүһүнэн уонна техника күүстээх көмөтүнэн ыйыллыбыт сирдэр тулалара тута ыраастанна, бөх-сах хомуллан, аналлаах сирдэргэ таһылынна. Уопсастыбаннай үлэҕэ бэйэлэрин бириэмэлэрин харыстаабакка, күүс-көмө буолбут бар дьоммутугар уонна техникалардаах олохтоохторго ис сүрэхпититтэн махталбытын тиэрдэбит. Норуот күүһэ — көмүөл күүһэ!