Сэргэх күн

Ахсынньы 6 күнүгэр Хара-Алдан нэһилиэгэр «Кыһын саха сириттэн саҕаланар» бырайыак чэрчитинэн нэһилиэк харыйатын уотун сандаардыы үөрүүлээх чааһыгар оҕо-аймах, дьон-сэргэ тоҕуоруһа муһунна. Быйыл алааспыт, айан аартыгар турар беседкаҕа Эһээ Дьыл сиэнинээн Хаарчааналыын кэлэр-ааһар дьону уруйдуу көрсүөхтэрэ. Бу киэһэ кырачааннарга бэлэхтэр туттарылыннылар, көрдөөх оонньуулар ыытылыннылар. Үүнэн иһэр сыл бука барыгытыгар үөрүүнү, дьолу, доруобуйаны аҕаллын»

Онтон киэһэ 19:00 чаастан нэһилиэк спорт саалатыгар тэрилтэлэр уонна оскуола үөрэнээччилэрин хомуур хамаандаларын икки ардыларыгар волейболга күрэх ыытылынна. Манна уһуйаан уонна ОДьКХ Хара-Алданнааҕы филиала, капитан Крылова А.А., оскуола үлэһиттэрин коллектива, капитан Винокуров Д.М., олохтоох дьаһалта уонна кыра тэрилтэлэр коллективтара, капитан Старостин Г.В., оскуола үөрэнээччилэрин хамаандата, Ноговицын Эрхан. Круговой киирсии, тыҥааһыннаах хапсыы кэнниттэн 3-с миэстэ оскуола учууталларын хамаандата, 2-с миэстэ олохтоох дьаһалта хамаандата, 1-кы миэстэ оскуола оҕолорун хамаандата таҕыста. Күрэх түмүгэр кыттааччылар мэтээллэринэн, кыайыылаах хамаанда кубогынан наҕараадаланна. Куруук спорду өрө тутан чөл туруктаах, чэгиэн сылдьыҥ!